Presentación do vídeo musical promocional de Lugo e a súa provincia "I"M FROM LUGO & I DON"T DENY IT"
Un proxecto realizado polo grupo musical "BATITAL" de Lugo e promovido pola Asociación Cultural do mesmo nome, no que participaron máis de 1000 lucenses. O obxectivo do vídeo é promover a unidade da cidade para que fóra de Lugo se fale das súas riquezas.
No acto intervirán D. Francisco M. Fernández Muinelo, presidente da Asociación Cultural "BATITAL"; D. Marcos Barrios Carreira, director técnico do proxecto e Dª Roser Ares Rodríguez, actriz protagonista.
A idea xurdiu a raíz dunha composición do grupo co lema "I"m from Lugo & I don"t deny it", impresionante campaña promovida polo diario El Progreso que tivo unha gran aceptación entre os lucenses de todo o mundo. A iniciativa deste septeto conseguiu a adhesión de personalidades de gran relevancia do mundo da cultura e o deporte.
O grupo Batital produciu o vídeo promocional da cidade con intervención de coñecidos lucenses como o actor Luis Tosar, a escritora Marta Rivera de la Cruz, o director de Informe Semanal Jenaro Castro ou o porteiro do Real Madrid Diego López, entre outros.
O vídeo acaba cun "lip dub" da pegadiza canción que se gravou na Praza Maior de Lugo e na que participaron numerosos lucenses.
O acto de presentación finalizará cun breve concerto acústico de Batital, no que interpretarán temas propios, salvo unha versión orixinal da coñecida "Negra sombra" de Juan Montes.
